ನವದೆಹಲಿ: ರೈತರ ಗುರುತಿನ ಚೀಟಿ (ಫಾರ್ಮರ್ ಐಡಿ) ನೋಂದಣಿಯಲ್ಲಿ ನಿಗದಿತ ಅವಧಿಗಿಂತ ಮುಂಚಿತವಾಗಿಯೇ ಗುರಿ ಸಾಧಿಸಲಾಗಿದೆ ಎಂದು ಕೇಂದ್ರ ಕೃಷಿ ಸಚಿವ ಶಿವರಾಜ್ ಸಿಂಗ್ ಚೌಹಾಣ್ ತಿಳಿಸಿದ್ದಾರೆ. 2024ರ ಸೆಪ್ಟೆಂಬರ್ 2ರಂದು ಕೇಂದ್ರ ಸಂಪುಟದ ಅನುಮೋದನೆಯ ನಂತರ ಆರಂಭಗೊಂಡ ಡಿಜಿಟಲ್ ಕೃಷಿ ಮಿಷನ್ ಅಡಿಯಲ್ಲಿ, ಗುರುತಿನ ಚೀಟಿ ಆಧಾರಿತ ವ್ಯವಸ್ಥೆಯ ಮೂಲಕ ದೇಶಾದ್ಯಂತ 6 ಕೋಟಿಗೂ ಹೆಚ್ಚು ರೈತರು ವಿವಿಧ ಯೋಜನೆಗಳ ನೇರ ಸೌಲಭ್ಯ ಪಡೆದಿದ್ದಾರೆ. ಪರಿಶೀಲಿತ ರೈತರ ದತ್ತಸಂಚಯದಿಂದ ವಂಚನೆ ಮತ್ತು ನಕಲಿ ಪರಿಶೀಲನೆಗೆ ಕಡಿವಾಣ ಬಿದ್ದಿದೆ. ಇಲಾಖೆಗಳ ನಡುವೆ ಸಮನ್ವಯ ಸುಧಾರಿಸಿದ್ದು, ಯೋಜನೆಗಳ ಅನುಷ್ಠಾನ ಮತ್ತು ಮೇಲ್ವಿಚಾರಣೆ ಸುಲಭವಾಗಿದೆ.ಈ ಸಾಧನೆಯನ್ನು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಸಾಮೂಹಿಕ ಶ್ರಮದ ಫಲ ಹಾಗೂ ಸಹಕಾರ ಒಕ್ಕೂಟ ವ್ಯವಸ್ಥೆಯ ಅತ್ಯುತ್ತಮ ಉದಾಹರಣೆ ಎಂದು ಚೌಹಾಣ್ ಶ್ಲಾಘಿಸಿದರು. ಗುತ್ತಿಗೆ ರೈತರು ಮತ್ತು ನಿಜವಾದ ಸಾಗುವಳಿದಾರರನ್ನು ಡಿಜಿಟಲ್ ವೇದಿಕೆಗೆ ತರಲು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳು ಕ್ರಮ ಕೈಗೊಳ್ಳುತ್ತಿವೆ. ಅರ್ಹ ಯಾವುದೇ ರೈತರು ಸರ್ಕಾರಿ ಯೋಜನೆಗಳಿಂದ ಹೊರಗುಳಿಯದಂತೆ ಮಾಡುವುದು ಇದರ ಉದ್ದೇಶವಾಗಿದೆ, ರೈತರ ಗುರುತಿನ ಚೀಟಿ ಕೇವಲ ಡಿಜಿಟಲ್ ಗುರುತಿನ ದಾಖಲೆಯಲ್ಲ, ಅದು ಪಾರದರ್ಶಕ ಮತ್ತು ರೈತ-ಕೇಂದ್ರಿತ ಆಡಳಿತದ ಅಡಿಪಾಯ ಎಂದ ಅವರು, ಆಧುನಿಕ ತಂತ್ರಜ್ಞಾನ ಅಳವಡಿಸಿಕೊಂಡು ತಮಗೆ ಅರ್ಹವಾದ ಸೌಲಭ್ಯಗಳನ್ನು ಪಡೆಯುವಂತೆ ರೈತರಿಗೆ ಕರೆ ನೀಡಿದರು.