✍️✍️ ಪವಿತ್ರ ಸದಾಶಿವ, ಜೆರಾಕ್ಸ್ ಅಂಗಡಿ, ಹೇರೂರು ರಸ್ತೆ, ಬಸವನಹಳ್ಳಿ, ಗುಡ್ಡೆಹೊಸೂರು, ಕುಶಾಲನಗರ ಕುಶಾಲನಗರದ ಸಮೀಪ ಬಸವನಹಳ್ಳಿಯಲ್ಲಿರುವ ನಮ್ಮ ಜೆರಾಕ್ಸ್ ಅಂಗಡಿಯ ಮುಂದೆ ಕೆಲವು ಬೀದಿ ನಾಯಿಗಳಿವೆ. ನಾವು ಪ್ರತಿದಿನ ಅವುಗಳಿಗೆ ಆಹಾರ ನೀಡುತ್ತೇವೆ. ಹಸಿದ ಜೀವಕ್ಕೆ ಅನ್ನ ಕೊಡುವುದು ನಮಗೆ ಮಾನವೀಯತೆಯ ಕೆಲಸ ಎನಿಸಿದೆ. ಆದ್ದರಿಂದಲೇ ಅವು ನಮ್ಮ ಅಂಗಡಿಯ ಮುಂದೆಯೇ ಇರುತ್ತವೆ. ಆದರೆ ರಸ್ತೆಯಲ್ಲಿ ಓಡಾಡುವ ಕೆಲವರು ಭಯದಿಂದ ಈ ನಾಯಿಗಳಿಗೆ ಹೊಡೆಯುತ್ತಾರೆ, ಕಲ್ಲು ಎಸೆಯುತ್ತಾರೆ. ಹೀಗೆ ನೋವು ಕೊಟ್ಟವರನ್ನು ನಾಯಿಗಳು ನೆನಪಿಟ್ಟುಕೊಂಡು ಅಟ್ಟಿಸಿಕೊಂಡು ಹೋಗುತ್ತವೆ. ಅಪಘಾತ ಮಾಡಿದ ವಾಹನಗಳನ್ನೂ ಬೆನ್ನಟ್ಟುತ್ತವೆ. ಇದನ್ನು ಬಿಟ್ಟರೆ ಅವು ಬೇರೆ ಯಾವ ತೊಂದರೆಯನ್ನೂ ಕೊಟ್ಟಿಲ್ಲ. ಇಲ್ಲಿನ ಕೆಲವು ಮನೆಯವರು ರಾತ್ರಿ ನಿದ್ರೆ ಮಾಡಲು ಬಿಡುವುದಿಲ್ಲ ಎಂದು ಹೇಳಿ ನಾಯಿಗಳಿಗೆ ಹೊಡೆಯುತ್ತಾರೆ. ಇತ್ತೀಚೆಗೆ ಒಂದು ನಾಯಿಯ ಮುಂಗಾಲು ಮುರಿದಿದೆ. ಇದನ್ನು ಕೇಳಲು ಹೋದರೆ ನಮ್ಮನ್ನೇ ಬೈಯುತ್ತಾರೆ. "ನೀವು ಆಹಾರ ಕೊಡುವುದರಿಂದ ಅವು ಇಲ್ಲಿರುತ್ತವೆ, ಹೊಡೆದು ಓಡಿಸಿ, ಇಲ್ಲದಿದ್ದರೆ ದೂರು ಕೊಡುತ್ತೇವೆ" ಎನ್ನುತ್ತಾರೆ. ವಿಷ ಹಾಕುತ್ತೇವೆ, ಹೊಡೆದು ಕೊಲ್ಲುತ್ತೇವೆ ಎಂಬ ಮಾತುಗಳೂ ಕೇಳಿಬರುತ್ತಿವೆ. ನಾವು ಮಾನವೀಯತೆಯಿಂದ ಆಹಾರ ಕೊಡುತ್ತಿದ್ದೇವೆ, ಪ್ರಾಣಿಗಳನ್ನು ಪ್ರೀತಿಸುತ್ತೇವೆ. ಇದು ತಪ್ಪೇ? ಈ ಬಗ್ಗೆ ಗ್ರಾಮ ಪಂಚಾಯಿತಿಗೆ ತಿಳಿಸಿದರೂ ಇದುವರೆಗೆ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ. ನಾವು ಪ್ರಾಣಿ ದಯಾ ಸಂಘದವರಿಗೆ ಕರೆ ಮಾಡಿದರೆ ಅವರು ನಾಯಿಗಳನ್ನು ತೆಗೆದುಕೊಂಡು ಹೋಗುವುದಿಲ್ಲ ಎಂದರು. ಬೇರೆ ಯಾವ ಮಾರ್ಗವೂ ನಮಗೆ ತಿಳಿಯುತ್ತಿಲ್ಲ. ನಾಯಿಗಳಿಗೆ ವಿಷ ಹಾಕುವುದು, ಹೊಡೆದು ಕೊಲ್ಲುವುದು ಕಾನೂನಿನ ಪ್ರಕಾರ ಅಪರಾಧ. ಹಾಗೆಯೇ, ಅಕ್ಕಪಕ್ಕದವರ ರಾತ್ರಿ ನಿದ್ರೆ ಮತ್ತು ದಾರಿಹೋಕರ ಸುರಕ್ಷತೆಯ ಚಿಂತೆಯೂ ನಮಗೆ ಅರ್ಥವಾಗುತ್ತದೆ. ಇಬ್ಬರಿಗೂ ನ್ಯಾಯ ಸಿಗುವ ದಾರಿ ಇರಬೇಕು. ಆದ್ದರಿಂದ ಗ್ರಾಮ ಪಂಚಾಯಿತಿ ಮತ್ತು ಪಶುಪಾಲನಾ ಇಲಾಖೆಯವರು ಈ ವಿಷಯದಲ್ಲಿ ಮಧ್ಯಪ್ರವೇಶಿಸಬೇಕೆಂದು ವಿನಂತಿಸುತ್ತೇವೆ. ನಾಯಿಗಳಿಗೆ ಲಸಿಕೆ ಹಾಕಿಸಿ, ಸಂತಾನಹರಣ ಚಿಕಿತ್ಸೆ ಮಾಡಿಸಬೇಕು. ಆಹಾರ ನೀಡಲು ಯಾರಿಗೂ ತೊಂದರೆಯಾಗದ ಒಂದು ನಿಗದಿತ ಸ್ಥಳವನ್ನು ಗುರುತಿಸಿಕೊಡಬೇಕು. ಹಾಗಾದರೆ ಮೂಕ ಪ್ರಾಣಿಗಳ ಜೀವವೂ ಉಳಿಯುತ್ತದೆ, ಸ್ಥಳೀಯರ ಆತಂಕವೂ ಕಡಿಮೆಯಾಗುತ್ತದೆ. ಧನ್ಯವಾದಗಳು🙏