ಕುಶಾಲನಗರ ಮೇ 31: ಕೊಡಗು ಜಿಲ್ಲೆಯ ಕೂಡಿಗೆಯಲ್ಲಿರುವ ಕೊಡಗು ಸೈನಿಕ ಶಾಲೆಯು ಮತ್ತೊಂದು ಪ್ರತಿಷ್ಠಿತ ರಾಷ್ಟ್ರೀಯ ಕ್ರೀಡಾಕೂಟಕ್ಕೆ ಸಾಕ್ಷಿಯಾಗಲು ಸಂಪೂರ್ಣ ಸಜ್ಜಾಗಿದೆ.
ಜೂನ್ 02 ರಿಂದ ಜೂನ್ 11 ರವರೆಗೆ ನಡೆಯಲಿರುವ ‘ಅಖಿಲ ಭಾರತ ಸೈನಿಕ ಶಾಲೆಗಳ ಅಂತರ ಸಮೂಹ ಫುಟ್ಬಾಲ್ ಪಂದ್ಯಾವಳಿ’ (ಪ್ರಿ ಸುಬ್ರೊತೊ ಕಪ್ 2026) ಯನ್ನು ಈ ಬಾರಿ ಕೊಡಗು ಸೈನಿಕ ಶಾಲೆಯು ಆಯೋಜಿಸುತ್ತಿದೆ.
ಸೈನಿಕ ಶಾಲೆಗಳ ವಾರ್ಷಿಕ ಚಟುವಟಿಕೆಗಳಲ್ಲಿ ಅತ್ಯಂತ ಪ್ರಮುಖವಾದ ಅಂತರ-ಶಾಲಾ ಕ್ರೀಡಾಕೂಟಗಳಲ್ಲಿ ಒಂದಾಗಿರುವ ಈ ಕ್ರೀಡಾ ಕೂಟ ದೇಶದ ವಿವಿಧ ಭಾಗಗಳಿಂದ ಆಗಮಿಸಲಿರುವ ಯುವ ಕೆಡೆಟ್ಗಳ ಕ್ರೀಡಾ ಕೌಶಲ್ಯಕ್ಕೆ ವೇದಿಕೆಯಾಗಲಿದೆ.
ಭಾರತದಾದ್ಯಂತ ವಿಸ್ತರಿಸಿರುವ 14 ಸೈನಿಕ ಶಾಲೆಗಳ ಒಟ್ಟು 22 ತಂಡಗಳು ಈ ಕ್ರೀಡಾಕೂಟದಲ್ಲಿ ಭಾಗವಹಿಸುತ್ತಿದ್ದು, ಸುಮಾರು 350ಕ್ಕೂ ಹೆಚ್ಚು ಕೆಡೆಟ್ಗಳು ಮೈದಾನದಲ್ಲಿ ಪ್ರಶಸ್ತಿಗಾಗಿ ಕಾದಾಡಲಿದ್ದಾರೆ.
ಫುಟ್ಬಾಲ್ ಮತ್ತು ಹಾಕಿ ಕ್ರೀಡೆಯೊಂದಿಗೆ ಆಳವಾದ ಐತಿಹಾಸಿಕ ನಂಟನ್ನು ಹೊಂದಿರುವ ಕೊಡಗು ಜಿಲ್ಲೆಗೆ ಈ ಪ್ರತಿಷ್ಠಿತ ಪಂದ್ಯಾವಳಿಯ ಆತಿಥ್ಯ ಸಿಕ್ಕಿರುವುದು ಇಡೀ ಜಿಲ್ಲೆಗೆ ಅಪಾರ ಹೆಮ್ಮೆಯ ವಿಷಯವಾಗಿದೆ. ಈ ಕ್ರೀಡಾ ಪರಂಪರೆಯು ಶಾಲಾ ಸಮುದಾಯದಲ್ಲಿ ಮತ್ತಷ್ಟು ಉತ್ಸಾಹವನ್ನು ತುಂಬಲಿದೆ. ಎಂದು ಕೊಡಗು ಸೈನಿಕ ಶಾಲೆಯ ಪ್ರಾಂಶುಪಾಲರಾದ ಕರ್ನಲ್ ಅಮರ್ ಜೀತ್ ಸಿಂಗ್ ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. ಹಾಗೂ ಈ ಪಂದ್ಯಾವಳಿಯು ಕೇವಲ ಒಂದು ಕ್ರೀಡಾ ಸ್ಪರ್ಧೆಯಷ್ಟೇ ಅಲ್ಲ. ಇದು ಭಾರತೀಯ ಸಶಸ್ತ್ರ ಪಡೆಗಳ ಭಾವಿ ನಾಯಕರಾಗಲಿರುವ ಯುವ ಕೆಡೆಟ್ಗಳಿಗೆ ಶಿಸ್ತು, ತಂಡದ ಕೆಲಸ (ಟೀಮ್ವರ್ಕ್) ಮತ್ತು ಸ್ಪರ್ಧಾತ್ಮಕ ಮನೋಭಾವವನ್ನು ಪ್ರದರ್ಶಿಸಲು ಸೂಕ್ತ ವೇದಿಕೆಯಾಗಿದೆ. ರಾಜ್ಯ ಮತ್ತು ಪ್ರಾದೇಶಿಕ ಗಡಿಗಳನ್ನು ಮೀರಿದ ಸ್ನೇಹವನ್ನು ಬೆಳೆಸಿಕೊಳ್ಳಲು ಇದು ನೆರವಾಗುತ್ತದೆ. ಇಂತಹ ಕ್ರೀಡಾಕೂಟಗಳು ಮುಂದಿನ ಪೀಳಿಗೆಯ ಅಧಿಕಾರಿಗಳಲ್ಲಿ ರಾಷ್ಟ್ರೀಯ ಭಾವೈಕ್ಯತೆ, ನಾಯಕತ್ವದ ಗುಣಗಳು ಮತ್ತು ಪರಸ್ಪರ ಗೌರವವನ್ನು ಮೂಡಿಸುವಲ್ಲಿ ಪ್ರಮುಖ ಪಾತ್ರವಹಿಸುತ್ತವೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಪಂದ್ಯಾವಳಿಯನ್ನು ಯಾವುದೇ ಅಡೆತಡೆಗಳಿಲ್ಲದೆ ಅತ್ಯಂತ ಯಶಸ್ವಿಯಾಗಿ ನಡೆಸಲು ಶಾಲೆಯ ಸಿಬ್ಬಂದಿ ಹಾಗೂ ಕೆಡೆಟ್ಗಳು ಉತ್ಸಾಹದಿಂದ ಶ್ರಮಿಸುತ್ತಿದ್ದಾರೆ.
ಹತ್ತು ದಿನಗಳ ಕಾಲ ನಡೆಯಲಿರುವ ಈ ಕ್ರೀಡಾಕೂಟದಲ್ಲಿ ಉನ್ನತ ಗುಣಮಟ್ಟದ ಫುಟ್ಬಾಲ್ ಪ್ರದರ್ಶನ, ತೀವ್ರವಾದ ಹಾಗೂ ಸೌಹಾರ್ದಯುತ ಸ್ಪರ್ಧೆಯನ್ನು ವೀಕ್ಷಿಸಲು ಕ್ರೀಡಾಭಿಮಾನಿಗಳು ಕಾತರರಾಗಿದ್ದಾರೆ ಎಂದು ಅವರು ತಿಳಿಸಿದ್ದಾರೆ.
